Persönlich

Zo mer:

Ig be es fröhlichs Bluememeitschi ond versueche täglich di viele Chliinigkeite, wo sLäbe bringe, ned nor s‘gseh, sondern dröber dankbar s‘sii!

Scho als Chind ha nig gern mit minä Händ kreativ g‘schaffet.

Fiini, zarti Farbe, es stimmigs Zämespiel, fein Choche, Singe ond Musig lose ond mis Deheime gmüetlich gstalte ghöre zo minä Liideschafte!

D’Familie, Frönde, d’Natur, dr eiget Garte, Ferie i de Bärge oder am Wasser….gueti Gspräch, …. mache sLäbe zuesätzlich riich!

Im November 2013 hätt s‘Lädeli-Projekt ganz spontan ond ohni Konzept mit em ne „ Brööggiwage „ si Afang gnoh ond mis Läbe ufe Kopf gstellt.

Voller Liideschaft ond Härzbluet esch es witter ond wittergange ond mit Elan send immer weder neui Projekt entstande ond sLädeli esch gwachse!

Mini Liebschte, d’Familie, wo s‘Wichtigschte bliibt i mim Läbe, i mim Alltag, onderstötzt mi mit viel Freud! Es esch s‘gröschti Gschänk, alli so nööch dörfe s‘ha!

Ned s‘letscht besch es DU, wo mi immer weder aatriebt ond motiviert! Es entstöhnd neui Ideen, d’Freud ond d‘Liideschaft nimmt keis Ändi! Nie hätt i mer ertröimt, dass so ne grosse Kondestamm mis gliebte Schluhelaedeli mit viel Treui onderstötzt!

I werde mi nie dra gwöhne ond i muess immer weder dankbar stuune, öber jedes Bluemewerch, wo Du poschte tuesch!

Ja….dank DIR, goht sLädeli-Läbe ned nor voller Freud witter, sondern es bhaltet de Stämpel „Liideschaft, Liebi ond Härzbluet“!

I be gspannt ond loh mi sälber öberrasche, wo mi de nächscht Schritt härreführt!

I freue mi riesig, wenn Du witter de Weg is Schluhelaedeli finde tuesch ond di mit mer gmeinsam lohsch lo verzoubere vo de Schluhelaedeli-Blüemli.

Du besch wunderbar! Du besch es Zahnrädli i mim Lädeli-Werch!

Danke vo ganzem Härze❤️

Euches Bluememeitschi vom Schluhelaedeli
d‘ Salome